Aguest pròplèu dissabte 11 de noveme, era Associacion de Donants de Sang dera Val d’Aran organize era 3au e darrèra jornada d’enguan de donacion de sang. Ua jornada que s’a premanit en format maraton, en orari d’11 deth maitin a 10 deth sèr, e que s’amiarà coma de costum en Palai d’Espòrts de Vielha. Ath long deth dia i auràn un pialèr d’actiuetats entara mainadèra, damb ginkanes e diuèrsi talhèrs, atau coma ua chicolatada. E fin finau se sortejarà ua panèra entre toti es donants. Mès, çò de mès important ei era solidaritat qu’es aranesi demòstren damb qui mès a de besonh era sang.

 Pendent es desparières jornades que se convòquen ath long der an, ena primauera, ostiu e tardor, era participacion des aranesi ei fòrça estable, en tot mantier bones chifres de bosses de sang. Maugrat açò, des dera associacion cèrquen ampliar era quantitat de donants que i pòt auer entad aguesta jornada.

Per tant, toti aqueri que siguen ena Val d’Aran pendent aguesta dimenjada an ua cita importanta, en çò que supause un acte altruïsta e que de ben segur fòrça gent arregraïrà.