Un an mès, dejà a agut lòc eth tradicionau Mercat Medievau d’Arties. Aguest pòble viatgèc ath passat pendent era dimenjada deth 11 ath 13 d’agost e vestic es sòns carrèrs principaus damb pannèus medievaus e cavalièrs.

Cada an centenats de persones s’apròpen a Arties entà passejar e gaudir deth bon ambient, qu’enguan a estat acompanhat tanben per ua bona temperatura.

Aquiu s’i poderen trapar desenes de paradetes enes quaus se venen productes artesanaus fòrça variats, des de hormatges e confetures a joguets de husta, pèires e jòies.

Ath delà, aguest tradicionau mercat compdaue damb ua ludòteca o espaci de jòcs infantils fòrça divertit, damb jòcs tradicionaus hèts damb husta e d’auti non tan tradicionaus ne coneguts mès fòrça visitats pes mès petits e es sòns pairs.

Mès enlà d’açò dissabte peth ser toti es assistents poderen gaudir d’un espectacle nocturn protagonizat per “Eth dimoni d’Arties”.

Aguest mercat ei dejà un acte fixe enes ostius d’Arties, un eveniment qu’acompanhe ara rèsta d’activitats qu’eth pòble aufrís pendent eth mes, coma es concèrts, actuacions de magia, talhèrs e espectacles infantils.