Era estacion d’esquí de Baqueira-Beret començarà era sason d’iuèrn aguest pròplèu dissabte 18 de noveme damb era dubertura parciau des sues installacions. Segotes eth comunicat qu’a emetut era direccion dera estacion aranesa, aguesta madeisha setmana se poderà gaudir d’un totau de 30 kms de pista esquiables. Es fòrtes nheuades e eth heired intens des darrères setmanes a propiciat ua abondiua quantitat de nhèu, que permeterà daurir eth sector de Baqueira damb un totau de 25 pistes en foncionament damb uns espesors de nhèu d’enquia 50 cms ena còta 2500.

D’aguesta manèra, s’auance er inici dera sason d’iuèrn d’enguan, qu’ère prevista entath 25 de noveme. De cara ad aguesti prumèri dies, era estacion a metut ara venda forfaits a prètzi especiaus, que seràn de 30€ entà adults e 20 entà menors d’edat. Cau rebrembar, qu’enguan coma nauetat, era estacion a installat un panèu indicatiu en pòble de Tredòs sus era situacion des diuèrsi parcatges de què dispause era estacion, entà qu’es esquiaires poguen saber ar instant a on s’an de dirigir entà parcar es sòns veïculs.

Aguesta sason, era estacion a previst mantier es installacions daurides enquiath pròplèu 8 d’abriu, ua setmana dempús de finalizar es hèstes de Pasca.