Eth plen der ajuntament de Bossòst s’a vist obligat a hèr ua modificacion de crèdit damb ua partida extraordinària d’un totau de 268.000€ entà poder complir damb era senténcia qu’emetec eth Tribunau Superior de Justícia de Catalonha era setmana passada contra er ajuntament, coma indemnizacion per responsabilitat patrimoniau, ena parcella a on en an 1991 se bastic era casèrna dera Guàrdia Civila de Bossòst. Ua decision qu’arribe en un moment en qu’eth consistòri se trape damb solvéncia economica.

Eth requeriment per part deth tribunau ei de compliment immediat, e per tant, aguesta aprovacion se va a hèr enes pròplèus dies, abantes de qu’acabigue eth termini maxim.

Ath delà, eth govèrn municipau a balhat compde dera economia der ajuntament respècte ar exercici de 2016. En aguest sens, era capacitat financera a aumentat de 74.000 a 215.000€ e eth romanent de tresaureria ara se place en 1,5 milions d’euros. 

Er ajuntament demore encara era responsa deth departament d’economia entà saber se s’a d’aplicar un 3au plan economic e financer que semble pòc factible o se s’an de préner mesures alternatiues. Ei un aspècte important, pr’amor que poderie afectar enes pressupòsti en tot contier futures partides.