Er Ajuntament de Les a dubèrt ua naua licitacion d'òbra entà conservar er auviatge materiau dera Torreta de Cledes o Casteret, un nau projècte cerque restaurar e conservar aguest espaci istòric, que compde damb era condicion de Ben Culturau d'Interès Nacionau.

Er objectiu ei rehèr era imatge d'aguesta torre de vigilància entà hèr-ne d'era un lòc visitable,en tot respectar e consolidar es murs e rèstes dejà existentes, eth delà, se condicionaràn es accèssi e er entorn. Era Torreta de Cledes complementarà era auferta deth Camin des Castèths de Les.

Era propòsta, redactada per arquitècte Jesus Filloy per encargue deth consistòri, cerque consolidar es murs existents deth Casteret e rebastir es parts qu'ac agen de besonh entà dar estabilitat e evitar eth deteriorament; bastir ua cleda entara seguretat des visitants, pr'amor qu'era tor ei bastida a fòrça nautada; e crear ua estructura metallica, ua plataforma e ua escala entar accés, aguest serà un bastiment independent as rèstes e se sajarà qu'age eth menor impacte visuau possible. 
 
Aguesta intervencion der Ajuntament de Les compde damb era collaboracion deth Departament de Cultura e s'i destinarà un pressupòst de pròp de 50.000 euròs.

IMATGES: AJUNTAMENT DE LES