Era Deputacion de Lhèida exigic ara Generalitat de Catalonha, a demana deth partit d'Unitat d'Aran e eth grop deth PSC, que revisiguen es marcs normatius en matèria d'escoles mairaus entà facilitar modèus adaptadi as realitats des petiti municipi e des sues situacions socio-economiques. 

Aguesta mesura siguec demanada en darrèr plen celebrat eth passat 23 de junh, e aprovada per unanimitat. Era mocion siguec defenuda peth deputat d'Unitat d'Aran, Paco Boya, que manifestaue qu'"ei evident qu'ei de besonh un tractament singularizat e adaptat ara realitat socio-economica de cada municipi". Boya ahigie que "mos cau exigir as administracions de Catalonha e der Estat, era maximala sensibilitat e eficiéncia ena elaboracion deth marc normatiu e ena assignacion des recorsi entà atier aguesti servicis essenciaus en tot çò restacat damb eth mon rurau e es municipis petiti".



IMATGE: Session Plenària dera Deputacion de Lhèida. (Foto: Facebook Deputacion de Lhèida)