Aguesta ei era imatge damb era que s’a lheuat aué era Val d’Aran. Era nhèu a començat a aparéisher en conjunt deth territòri, en tot auançar ua estampa iuernau provocada per ua fòrta baishada des temperatures pendent es darrèri dies. Se ben ja auie nheuat pendent era darrèra setmana en ua còta minima de 1400 mètres, aué, era còta a baishat enquiàs 700 mètres, ei a díder, enquiara termièra francesa. Es acantierament de nhèu mès importantes les trapam enes còtes anautes, a mès de 1500 mètres, damb ua acumulacion ath tor des 40 centimètres de nhèu. Era temperatura se manten ath long deth dia entre -1ºC e es 6ºC.

En çò que tanh ara circulacion pes desparières vies, ei obligatori er emplec des shènes en Pòrt de la Bonaigua, mentre qu’en Tunèl de Vielha e ena rèsta dera nacionau 230 en direccion a França se pòt circular damb normalitat.

De cara a deman diuendres, se demore ua jornada embromada, e damb ua baisha probabilitat de precipitacion, qu’en tot cas se poderie produsïr cap ara tarde en còtes elevades.