Era Val d'Aran torne a acuélher ua grana notícia esportiua abantes d'acabar er an. Era 98au edicion dera Volta Ciclista a Catalunya, qu'aurà lòc deth 19 ath 25 de març de 2018, compdarà damb un parelh d'etapes en tèrres araneses. Concretaments, era 5au etapa, aurà Vielha coma lòc d'arribada ena Avenguda Garona, mentre qu'era gessuda dera 6au etapa aurà lòc des deth parcatge des antigues casèrnes militares tanben deth cap-lòc dera Val d'Aran. 

Autant des deth Conselh Generau d'Aran coma des der ajuntament de Vielha e Mijaran son tanplan satisfèts de qu'era Val d'Aran e Vielha siguen scenaris d'ua pròva ciclista importanta. En aguest sens, eth vicesíndic prumèr d'Aran, Luis Carlos Medina, afirme que "se referme era escomesa deth Govèrn d'Aran entà restacar-se a grani eveniments esportius e sustot ath ciclisme, que compde damb un gran nombre d'aficionadi ena Val d'Aran e damb ua aufèrta unica en tot eth Pirenèu de rotes de ciclotorisme e de BTT damb mès de 400 Km de rotes homologades e accessibles entà toti es nivèus." D'aute biais, eth baile der ajuntament de Vielha e Mijaran, Juan Antonio Serrano, assegure qu'"arraitz d'eveniments coma era Volta Ciclista a Catalunya, Vielha e Mijaran, contunhe en tot reafirmar-se coma un municipi de referéncia esportiua gràcies ath sòn espectacular entorn e toti es servicis qu'aufrís."