Pendent es dies 9 e 11 d'octubre aurà lòc era 5au edicion desJornades Tecniques de Nhèu e Lauegi (Pyrenean Symposium on Snow and Avalanches) en Andòrra Congrés Centre, ena poblacion d’Òrdino (Andòrra).

Aguest eveniment, que compdarà damb era preséncia de Jose Antonio Boya, a estat organizat per Institut Cartografic e Geologic de Catalonha (ICGC), er Institut d'Estudis Andorrans (IEA), er Observatòri dera Sostenibilitat d'Andòrra, eth Servici Meteorologic de Catalonha e eth Conselh Generau d’Aran, a trauès deth Centre de Prediccion de Lauegi dera Val d’Aran.

Aguestes jornades son un punt d'amassada entà aqueres persones que, tant particulara coma professionauments, se interèssen peth mon dera nhèu e es lauegi. Enguan, aguestes jornades s'estructuraràn enes blòcs tematics següents:

• Meteorologia de montanha.
• Nhèu e recorsi idriqui.
• Cambi climatic.
• Prediccion de lauegi.
• Cartografia de lauegi.
• Dinamica de lauegi.
• Prevencion e proteccion.
• Seguretat en activitats de montanha.
• Divulgacion.

Pendent aguesti tres dies i aurà conferéncies, presentacions oraus e pannèus. S'includirà un espaci d'exposicion entà enterpreses e institucions damb activitats relacionades damb era tematica des jornades.

Laguens des conferéncies destaque era de Montse Bacardit, sus "Capes fèbles persistentes: cronica e leçons aprenudes deth principau problèma de lauegi ena Val d'Aran era sason 2016-2017", e era taula redona damb era participacion de Aymar Navarro, Iñigo Ayllón, Francisco Poujarniscle, Carlos García e Ivan Moner, dubèrta ath public, damb professionaus der àmbit dera prediccion de lauegi, guides de montanha e esportistes.

Eth darrèr dia se visitaràn sus eth terren diuèrsi lòcs d'interès dera parròquia d’Òrdino relacionadi damb era tematica des jornades.

IMATGES: CONSELH GENERAU D'ARAN