Aguest pròplèu dimenge 24 de seteme, entàs 12:00, es signants deth Manifèst de Les convòquen ua concentracion ena plaça dera glèisa de Vielhaentà refusar es darrères actuacions qu'a amiat a tèrme er Estat Espanhòu en Catalonha. Segontes comenten es convocants, aguestes actuacions son mès pròpries d'Estats autoritaris que d'ua democràcia deth sègle XXI. Emilio Medan, baile de Les, e signant deth Manifèst de Les, afirme que "cau lheuar era nòsta votz en contra dera actuacion der Estat Espanhòu, qu'atèmpte contra es drets elementaus individuaus e collectius. Es drets fonamentaus son alebadi e mos trapam en un estat d'excepcion d'amagat".

Era concentracion, afirmen, va mès enlà der Òc o eth Non deth referendum. "Non se pòt encausar a mès de 700 bailes de Catalonha per aguest ahèr, era actuacion der Estat Espanhòu ei mès apròp dera Turquia d'Ergodan que dera democràcia deth Regne Unit", ahigís Medan.


"Dempús de veir es darrèri episòdis que s'an viscut, credem qu'ei de besonh gésser en defensa dera democràcia ena Val d'Aran e des institucions araneses", afirme Àlex Moga, signant tanben deth Manifèst de Les.

Pendent er acte se liegerà un manifèst a on se refusen es actuacions der Estat Espanhòu e sajar de conscienciar ara gent dera importància de participar en referendum deth pròplèu 1 d'octobre.