Contunhe era preocupacion ena Val d’Aran pes constants avistaments d’ossi en territòri, cada còp mès a pròp des poblacions. Es darrèri an agut lòc aguesta madeisha setmana, un ena Ribèra de Valarties, a on dus gojats dera zòna se trapèren damb un exemplar quan anauen en coche, e er aute en Les, a on ua vesia se trapèc un os joen laguens deth nuclèu urban.

Ena reunion tecnica qu’auec lòc dimars en Conselh damb es expèrts dera Generalitat, s’expliquèc qu’un des motius pes quaus, en aguesti moments, i a ossi que s’apròpen tant as poblacions ei qu’es femelhes an abandonat dejà as cries qu’aueren hè dus ans e aguestes encara van un shinhau desubicades.

Major ei era preocupacion pes constants atacs deth mascle Goiat, liberat ara hè un an en Alòs d’Isil, e qu’a dat mòrt enes darrèri mesi a un totau de 15 oelhes, dues cavales adultes e un popenc. Çò de mès preocupant ei que dus d’aguesti atacs se produsiren laguens d’estructures de proteccion, qu’er os podèc evitar entà atacar.

Ei previst que molt lèu i age ua amassada entre eth Conselh e eth Departament de Territòri e Sostenibilitat dera Generalitat, a on eth govèrn aranés demore que se pogue préner ua decision definitiua sus aguest exemplar.

Ua situacion que cada còp preocupe mès as aranesi, que se senten desprotegidi deuant dera amenaça que supause trapar-se cara a cara damb un d’aguesti animaus.