Un an mès, dejà s’an iniciat es Jornades Micologiques dera Val d’Aran. Aguest eveniment, organizat peth Conselh Generau d’Aran amassa damb era Societat Catalana de Micologia e Torisme Val d’Aran, aurà lòc pendent es dies 21 e 24 de seteme.

Pendent aguesti dies se realizaràn activitats çò de mès diuèrses, entre eres gessudes de camp enes quaus toti es interessats pòden gésser a cercar misharnons acompanhats d’un grup d’especialistes en aguest camp, que resolveràn toti es dubtes qu’es aficionats ad aguesta activitat poguen auer.

Enguan es Jornades Micologiques dera Val d’Aran celèbren era sua edicion numerò 11, e somen un an mès trapant e descorbint espècies estranhes e especiaus de misharnons e dant-les a conéisher as aficionats. 

Pendent eth prumèr dia d’aguest eveniment, s’a realizat ua gessuda entà remassar es exemplars que se poderàn visitar aguesta dimenjada ena exposicion qu’aurà lòc en Conselh. 

Ua vintea de participants a assistit ad aguesta prumèra jornada micologica, ua activitat que destaque un des atractius d’aguest territòri tan naturaument arric e que supause un reclam toristic mès entara gent de dehòra, atau coma un entreteniment fòrça saludable entàs aranesi.