Er IEA- Acadèmia aranesa dera lengua occitana dejà a realizat era presentacion deth borrolhon deth Vocabulari Basic der Aranés, ara quau assistiren, eth passat 17 de noveme, es volontaris qu'an participat ena sua elaboracion. 

Aguest Vocabulari Basic, que se publicarà a finaus d'an, ei ua òbra compausada per 2.500 entrades qu'incorpòre es mots e locucions mès emplegades en aranés, ath delà d'un milèr de toponims internacionaus. S'a previst que se convertisque, en un termini de dus ans en Diccionari Escolar der Aranés. 

Eth president der IEA-Acadèmia aranesa dera lengua occitana, Jusèp Loís Sans, afirmèc qu'ei previst qu'eth Diccionari Escolar incorpòre mès de 10.000 entrades e que sigue era basa d'un diccionari digitalizat de creacion e de melhora contínua. Era Seccion Aranesa dera Acadèmia a corregit tot eth trabalh, li a dat coesion tecnica e ei era responsabla deth resultat.

Sans, remerquèc qu'er aranés patís en aguesti moments un excès d'indefinicion e qu'era foncion dera Acadèmia ei ajudar a definir-la, pr’amor qu'enes principis basics dera madeisha ei eth dera socializacion dera lengua coma element de referéncia. Entà eth, er hèt que s'age compdat damb era participacion de 17 volontaris e uns 60 collaboradors, apòrte riquesa e equilibri ath Vocabulari.

Eth Vocabulari Basic der aranés e eth Vocabulari dera Tecnologia dera Informacion conformaràn en moment dera sua publicacion eth conjunt lexicau mès important numericament der aranés damb mès de 5.000 mots.

Es autors des aportacions ad aguest trebalh son: Antoni Nogues, Anna Sala, Carmen Roy, Eduardo Orduña, Ingrid Jaquet, Jusèp Castet, Lourdes Santacruz, Lucia Mas, Lluisa Reig, Marçal Girbau, María Cuny, Ma. José Estévez, Ma. José Saurina, Maria Roy, Paloma Puche, Pilar Barés e Jusèp Loís Sans.

IMATGES: CONSELH GENERAU D'ARAN