Era Escòla Ruda de Salardú acuelhec ua session informatiua dera pediatra Immaculada Caubet sus malauties infeccioses. Aguest acte, formaue part d’un projècte dera assignatura d’etica, ena quau es petits an estudiat aguest tipe de malauties e es sues possibles afectacions.

Ena charrada i sigueren presents toti es alumnes de primària deth centre, atau coma es sòns mèstres, pairs e mairs.

Pendent aguest collòqui se visualizèc prumèr un vidèo explicatiu e damb testimònis de diuèrses persones afectades per bèra malautia infecciosa, e dempús se passèren as explicacions e as preguntes des mès petits, que se mostrèren fòrça observaires e interessats per aguest tema.

Era doctora Caubet restaquèc era importància que pòden auer detalhs tan petiti coma  lauar-se es mans molt soent e a consciéncia, non anar tara escòla quan s’està malaut entà non contagiar a cap companh o estossegar en code e non ena man, entà evitar passar es nòsti virus as auti.

Ath delà, era pediatra tanben expliquèc as mairs e pairs era importància d’anar en menor temps possible ath mètge se ven qu’es sòns hilhs non estan ben, pr’amor qu’enes malauties infeccioses actuar damb rapidesa pòt arribar a èster vitau.

Un projècte fòrça interessant entà qu’es mainatges aprenguen un shinhau mès sus coma foncionen es sòns pròpi còssi, coma pòden afectar es malauties infeccioses e coma les pòden evitar damb es abituds avientes.