Pendent un comunicat oficiau, Unitat d'Aran a volut manifestar "era sua preocupacion pes eveniments que viu Catalonha dempús des hèts deth 6 e 7 de seteme e es posteriors actuacions policiaus enes institucions catalanes"

Era formacion afirme qu'en aguesti moments de gravetat, "lamente lamente veir comprometudes es institucions catalanes atau com er impacte qu’aguesti hèts pòden auer ena vida vidanta des persones e en sòn accès as servicis publics".

En aguest comunicat, UA ditz que judicializar era politica non ei era solucion ad aguest problèma que viu Catalonha, "mès tanpòc i a solucion dehòra dera legalitat pr'amor que, era via unilaterau solet pòrte ar afrontament".

Per aguest motiu, demanen ath Govèrn d'Espanha e ara Generalitat de Catalunya, parar "era escalada de tension" e retornar ath si des institucions entà arténher un espaci d'entesa e acòrd a trauès deth dialòg que permete "definir es propòstes politiques que donguen solucions as reclamacions dera societat catalana".

Unitat d’Aran "respècte es decisions deth pòble catalan e manten qu’Aran a estat tostemp un espaci de convivéncia e de bon vesiatge e consideram que non ei positiu tara societat aranesa perméter qu’es opinions politiques, tostemp respectables, acaben en  accions provocadores que meten en risc era nòsta conviuença".

Hèn ua crida as vesins e vesies d'Aran entà mantier-se "fèrms ena conviccion que, sonque eth pacte, eth dialòg e er acòrd son es instruments acceptables enes conflictes politics" e ac refermen damb era sua volontat de "de non alimentar n'era confrontacion, n'era crispacion".