UA denóncie ua grèu retalhada per part d'Ensenhament en Aran

13/09/2017

Unitat d'Aran a denonciat ua fòrta retalhada en professorat dera Escòla Garona de Vielha, erestudi damb un major nombre d'alumnes de tota era Val d'Aran e eth dusau mès gran laguens des Servicis Territoriaus de Lhèida. 

Eth centre acuelherà aguest cors un totau de 506 alumnes des cicles d'educacion infantil e primària e compdarà damb sonque 38 mèstres, dus mens qu'er an passat. Cau híger, qu’en cors 2011-2012 compdauen damb un totau de 49 mèstres quan sonque i auien catorze escolans mès qu’es actuaus.

Entara entitat politica, aguesta retalhada ena educacion des aranesi se some ara lista de desbrembes que patís Aran per part dera Generalitat.

Aguesta preocupacion s’harà arribar per part d’Unitat d’Aran ath Conselh Generau d’Aran atau coma ath govèrn catalan.

Ua retalhada qu’afècte a un des sectors mès importants dera societat aranesa, un sector que contunhe foncionant gràcies ara dedicacion e er esfòrç d’aguesti professionaus docents.

Clara Villar