Pendent aguesta setmana ua trentia de persones dera Mancomunitat deth Valle del Jerte (Extremadura) an visitat era Val d'Aran entà conéisher de prumèra man eth sòn modèl toristic. 

Es responsables des municipis, denominacions d'origina e entitats toristiques e de desvolopament deth Jerte vòlen fixar-se ena experiéncia de Torisme Val d’Aran entà elaborar eth sòn Plan Estrategic de Torisme e conéisher es punts a on pòt auer coïncidéncies, entà impulsar eth desvolopament toristic deth sòn territòri.

Era Conselhèra de Torisme e Desvolopament Economic d’Aran, Anna Díaz, acuelhec en Conselh Generau d’Aran ad aguesta delegacion e les expliquèc eth camin recorrut pera sua equipa sus eth reconeishement de Destinacion Toristica Intelligenta, qu'avale era incorporacion ath modèl toristic dera Val d’Aran en trabalh en innovacion, tecnologia, sostenibilitat e accessibilitat, quate factors competitius que garantissen eth present e eth futur deth torisme ena Val d’Aran. 

Era Conselhèra Díaz afirmèc qu'Aran auance entà un nau modèl de desvolopament toristic basat enes principis dera sostenibilitat, era diuersitat culturau e era responsabilitat sociau, çò que contribuís a hèr deth nòste territòri ua destinacion toristica basada en respècte ara sua cultura, eth miei ambient e era responsabilitat.

Ara madeish eth Valle del Jerte ei ena fasa de pre-diagnostic en procès entà convertir-se en destinacion intelligenta.

IMATGE: CONSELH GENERAU D'ARAN