Pendent aguesta passada maitiada, era Val d’Aran a patit un nau atac per part des ossi. En aguest cas, 3 oelhes an morit en parçan d’Òrri, enes terrens dera estacion de Baqueira-Beret. Un nau atac, que contunhe en tot engrossir era chifra d’atacs qu’enguan supèren quinsevolh donada enregistrada pendent es darrèri ans. D’aguestes 3 oelhes mòrtes, 1 ei atribuïda a Goiat, qu’ei er os que mès bestiar a aucit enguan, en tot superar era vintia.

Tot indique qu’aguest atac a estat amiat a tèrme per un mínim de dus ossi, pr’amor que son diuèrses oelhes en desparières emplaçaments. Es pagesi dera Val d’Aran comencen a èster harti d’aguesta situacion, pr’amor qu’es indemnizacions posteriores non compensen era rentabilitat des caps de bestiar qu’an perdut. Deuant des darrèri casi, dejà comencen a pensar en actuacions desesperades.

Era preocupacion ei maxima, sustot, en tot tier en compde era sason toristica d’ostiu que tot just comence ara. Darreraments son fòrça es casi d’atacs enregistradi, e i a pòur de que i age visitaires que non volguen caushigar es montanhes quan visiten eth territòri.