Era Val d’Aran a acuelhut pendent es dies 18 e 20 d’octubre eth 4au Congrès d’Agents Forestaus e Mieiambientaus, un acte qu’a compdat damb 400 inscrits que venguien de diferents parts der estat espanhòu, França e Andòrra.

Er eveniment siguec inaugurat pera tinent de baile der Ajuntament de Vielha e Mijaran, Maria Vergés, eth director de Politiques de Montanha dera Generalitat, Albert Alins, e eth Síndic d’Aran, Carlos Barrera.

Aguest congrès a tractat a hons aspèctes coma era seguretat des agents forestaus enes sues intervencions, especiauments dempús deth trist assassinat de dus des sòns companhs en Aspa aguest madeish an.

Tanben s’an tractat d’auti aspèctes coma era aplicacion des naues tecnologies en ambit des accions des agents o er ús de cans ena deteccion de podoms o d’auti productes quimics.

Es organizadors deth congrès an felicitat publicaments er acuelh qu’a agut er acte e an volgut arregrair eth supòrt rebut per part deth Conselh Generau d’Aran, er Ajuntament de Vielha e Mijaran, era Deputacion de Lhèida e er Institut entath Desvolopament e era Promocion deth Naut Pirenèu e Aran (IDAPA).

Aran a aufrit ad aguesti 400 agents es sòns servicis d’ostalaria e restauracion, tot enquadrat en un entorn naturau incomparable.