Enguan, era Generalitat de Catalonha invertirà mès de 15 milions d'euròs en matèria de prevencion d'incendis, 10'5 des quaus van destinats directament a actuacions de prevencion e era rèsta a despeses de personau, contractacions de mejans aerians, campanhes informatives o manteniment des Agropacions de Defensa Forestau. 

En aguest an 2017, se destinaràn 4'4 milions d'euròs a gestion forestau sostenible e 3 milions a trebalhs silvicoles e a pistes forestaus.

Segontes era conselhèra d'Agricultura, Ramaderia, Pesca e Alimentacion, Meritxell Serret, "er unic mecanisme de luta efectiu qu'existís ei era gestion forestau continuada, integrant totes es mesures de prevencion que siguen de besonh".

Laguens dera estrategia d'actuacion, se priorizen es actuacions forestaus preventives enes Perimètres de Proteccion Prioritària, ei a díder, zònes identificades coma d'especiau risc e a on cau intensificar es actuacions de prevencion. 

Ua des principaus preocupacions ei era situacion enes zònes urbanes-forestaus, per aguest motiu un des principaus objectius d'aguesta campanha ei incentivar era autoproteccion, per aquerò eth Departament d'Agricultura, Ramaderia, Pesca e Alimentacion a destinat 1 milion d'euròs a ajudes entà incentivar qu'es ajuntaments apliquen mesures de prevencion d'incendis forestaus en urbanizacions, nuclèus de poblacion, edificacions e installacions plaçades en terrens forestaus o que se trapen a 500 mètres d'aguesti.