Es Agents de Miei Ambient assistissen a ua formacion en seguretat en entorn der elicoptèr

06/06/2017

Agents de Miei Ambient dera Val d’Aran an participat aguest maitin ena jornada de formacion sus seguretat en entorn der elicoptèr impartida per tres especialistes deth còs des Agents Rurals dera Generalitat de Catalonha.

Pendent es trebalhs de seguiment de fauna e antifurtivisme, a causa des caracteristiques orografiques dera Val d’Aran, ei necessari eth supòrt der helicòpter des Agents Rurals. D’aciu era necessitat d’aguesta formacion entà poder desvolopar eth sòn trebalh d’ua manera eficient, eficaç e segura.

Es practiques s'includissen laguens deth marc deth convèni de collaboracion entre eth Departament d’Agricultura, Ramaderia, Pesca e Alimentacion dera Generalitat e eth Conselh Generau d’Aran. E, per normatiua, tant es integrants deth còs d’Agents de Miei Ambient coma es Agent Rurals se ven obligats a auer ua formacion constant e recorrent entà minimizar eth risc enes sòns trebalhs.

Aguesta jornada a agut lòc ena Bòrda de Lana de Bagergue e, en era, es agents aranesi an metut en practica es conselhs des Agents Rurals tant damb er elicoptèr parat coma en moviment.

A compdar d’ara, era formacion en seguretat en entorn der elicoptèr serà obligatòria, e aqueri que non l’agen non poiràn participar en cap des servicis que requerisquen er usatge d’aguest transpòrt.

Clara Villar