Aguest maitin a agut lòc ena sedença deth Conselh Generau d’Aran ua amassada tecnica entà avalorar es atacs produsit per os Goiat pendent es darrères setmanes ena Val d'Aran, qu'a dia d'aué representen ua quinzea de oelhes, un popenc e dues cavales adultes. Gràcies ath localizador GPS, s'a podut constatar era preséncia de Goiat enes lòcs des atacs. 

Aguesta reünion ei part d'un procès d'avaloracion deth comportament der animau e en era s'an avalorat era frequéncia e circonstàncies des atacs, en tot restacar sus tot era mòrt des dues cavales e es atacs realizadi as ramats de oelhes maugrat era preséncia de mesures de proteccion coma corraus e pastorets electrics. 

S'a acordat realizar un seguiment mès intensiu der animau, pr’amor qu'es donades deth GPS arriben damb ores de diferéncia, entà poder constatar d'ua manèra mès rapida se s'an produsit naui atacs e, d'aguesta forma, poder aplicar es mesures adequades segontes eth protocòu establit en cas d'elements conflictius.

Tanben s'a acordat analisar es circonstàncies de cadun des atacs mejançant ua recopilacion dera informacion disponibla (includint tanben era procedenta de França) entà avalorar damb major precision era conducta der os.

En aguesta darrèra dimenjada, s'an podut observar enes montanhes d’Aran un totau de sies exemplars d'ossi, circonstància que poderie èster motivada perque ena epòca de gelosia es femelhes se separen des cadèths neishudi hè dus ans e qu'enquiath moment encara anauen damb eres.