Eth Musèu dera Val d’Aran de Vielha acuelhec era celebracion dera Jornada Internacionau des Musèus. En aguest cas, er actiuetat amiaue per nòm “Eth huec en temps de guèrra”, damb er objectiu de rebrembar desparièrs conflictes belics que i a agut ena Val d’Aran ath long dera sua istòria. Entà començar, era tecnica de patrimòni deth Conselh Generau d’Aran, Elisa Ros, aufric ua petita charrada sus Castèth Leon, un castèth senhoriau deth pòble d’Es Bòrdes, qu’ara madeish se trape en tarcums. Se presentèren diuèrsi objectes qu’encara se conserven d’aguest lòc, coma son desparières bales e bombes.

D’aute biais, er istorian Josep Calvet, aufric ua conferéncia entà parlar dera importància dera Val d’Aran coma territòri qu’acuelhec a milèrs de refugiats joèus pendent era fin dera 2au Guèrra Mondiau. Era proximitat damb era termièra francesa, facilitèc aguesta hujuda des joèus dera persecucion nazi.

E, fin finau, se podec visualizar eth vidèo enregistrat pera campanha “Protegits e Sauvats”, damb diuèrsi testimònis sus aguest episòdi nere dera istòria actuau.