Vielha acuelhec pendent es dies 7 e 11 d’agost un cors intensiu de teatre de consciéncia e educacion emocionau, ua activitat impartida per Pax Dettoni a on çò de mès important èren es emocions des pròpies participants.

Aguesta formacion a compdat damb era participacion d’un totau de 7 hemnes, quauques des quaus dejà auien assistit prèviament a ues autes formacions impartides per Pax Dettoni. Totes eres coincidissen en que d’ua o de ua auta manèra aguest cors de teatre de consciéncia les a servit entà créisher un shinhau mès interiorament, mès tanben entà superar berà pòur, en aguest cas, a escèna.

Tot e qu’encara non se sap segur, ei possible qu’aguesta sigue ua formacion continuada, ei a díder, que gràcies ar èxit d’aguest prumèr cors de teatre de consciéncia e educacion emocionau i age futures edicions. En cas de repetir-se, es assistents a d’aguesta prumèra edicion non sonque tornarien a assistir, senon qu’ath delà ac recomanen a totes aqueres persones qu’ac volguen provar. 

Çò de mès destacable d’aguesta activitat a estat era bona connexion que i a agut entre es participants, un grup de set hemnes qu’a sabut trèir lo milhor des autes. 

Des dera organizacion tanben s’a volgut destacar era collaboracion e predisposicion der Ajuntament de Vielha e Mijaran entà organizar aguesta activitat culturau.

Ua activitat dilhèu non guaire coneguda, especiaument en un lòc tan petit, mès qu’a aportat fòrça coneishements sus es pròpies emocions as sues participants, uns coneishements que de ben segur que contunharàn aplicant en sòn dia a dia.