Dijaus pera tarde auec lòc eth tradicionau Hestivau de finau de cors dera Escòla Musicau Val d’Aran.

Desenes de pares e d’autes espectadors ampliren era Sala Era Audiovisuau de Vielha entà gaudir der espectacle qu’aufrien es petits artistes d’aguesta escòla.

Mès de dues ores d’espectacle a on aguesti joeni e talentosi musicians heren gaudir ath sòn public damb pèçes de Beyer, Thompson o Beethoven, entre d’auti, mès tanben damb musica modèrna d’autors coma Queen, Adele o Blaumut.

Ath delà, era orquèstra de guitarres interpretèc musica occitana, coma es Caulets, Jan Petit o Montanhes Araneses, coma prèvia ara sua actuacion d’aguest pròplèu dissabte ena glèisa de Mijaran en er acte de liurament des prèmis des concorsi literaris Mossen Condò Sambeat e Aran de Literatura.

Es assistents poderen gaudir d’un concèrt de mòstra de tot aquerò qu’aguesti joeni aprenen ena escòla de musica pendent er an, toquèren era guitarra, eth piano, eth violin e actuèc tanben era banda de rock.

Era gran nauetat d’enguan sigueren es videoclips. Un totau de quate vidèos musicaus de cançons originaus e interpretades pes petits. Un moment fòrça divertit e doç a on se podèc observar coma de ben sa’c passen enes sues classes de musica.

Un an mès, aguest cors de musica s’acabe, mès era Escòla Musicau Val d’Aran les demore, coma tostemp, dempús der ostiu damb es piles cargades e fòrça causes qu’ensenhar-les.