Dijaus passat auec lòc ena sedença deth Conselh Generau d'Aran era presentacion deth libre de Cinta Arasa: "Mission Trobairitz!", damb illustracions d’Ignasi Blanch. 

Aguesta istòria, qu'ei basada en hèts reaus, se place ena Occitània dera Edat Mejana, a on es trobadors recitauen es poèmes qu'aqueri òmes que sabien escríuer les proporcionauen. Es hemnes en aqueri tempsi non auien accès a poder difóner arren de çò qu'escriuien e ac hègen d’amagat.

Ua net, pòc abantes deth Gran Concors de Trobadors deth Lengadòc, un grop d’ombres misterioses aucupe es carrèrs de Tolosa. Londeman fòrça parets apareishen plees de poèmes escriti damb tinta violeta. Ne es sues pròpies autores, hemnes poètes enquia alavetz desconeishudes, en saben arren. 

Pendent era presentacion dera sua naua òbra, Arasa siguec acompanhada peth Sindic d'Aran, Carlos Barrera, e era arreviradora dera òbra ar aranés, Maria José Fernández. En aguest acte, era autora deth libre descriuec as trobairitz coma hemnes qu'escriuen poesies qu'hèn cantar es paraules. 

Eth Sindic declarèc qu'aguesta òbra, dera editoriau Animallibres, ei un libre d’interès coma materiau didactic entàs escòles dera Val d’Aran pera sua tematica plan restacada damb era lengua aranesa.

Cinta Arasa, qu'escriu a compdar des onze ans, a publicat d’auti libres entà mainatges coma "El món dalt d’una sabata", "La lluna és dolça, Ahmed!" e "Zeineb, la primera enxaneta".

IMATGES: CONSELH GENERAU D'ARAN