Era Bibliotèca Generau de Vielha ei d’aniversari, e entà celebrar es sòns 16 ans an premanit ua setmana fòrça especiau plia d’activitats entà toti es publics. De hèt, aguesta setmana ei sonque un reflèxe de totes es activitats qu’aguest espaci organize pendent er an: projeccions de cinèma, conda condes, recomanacions de libres entà pairs e mainatjons, trobades des Clubs de Lectura...

Ath delà de tot açò, pendent dijaus e diuendres, 23 e 24 de noveme, se procedirà tanben ath liurament des prèmis deth Concors de Fotografia “Eth Mèn Repopet” e dera dusau edicion deth Concors de Microrelats, qu’er an passat dejà siguec tot un èxit.

Çò de mès destacable d’aguest espaci que mos apròpe a toti un shinhau mès ara cultura ei eth contacte damb toti es professionaus qu’i trebalhen e s’esfòrcen entà hèr dera lectura ua aficion divertida entà grani e petits.

Dempús de 16 ans sonque mos manque desirar ara Bibliotèca Generau de Vielha fòrça felicitats peth sòn gran trebalh, e que contunhen molti ans mès apropant as aranesi eth sòn amor pes libres e era cultura.