Eth Conselh Generau d’Aran torne a convocar eth Prèmi Aran de Literatura, qu'enguan celèbre era sua XXVIIIau edicion. Aguest concors literari dubèrt a toti es interessats e interessades aurà un totau de tres categories: "Narracion", "Poesia" e "Novèlla Juvenila".

Es requisits ena categoria "Narracion" ei presentar minim 25 huelhes de DIN A-4 sonque per ua cara, en "Poesia" s'a de presentar un escrit de minim 70 vèrsi e en "Novèlla Juvenila" s'an d'escríuer un minim de 20 huelhes DIN A-4 sonque per ua cara.

Enes categories "Narracion" e "Poesia", eth prumèr prèmi serà de 1.000 euròs e un diplòma, eth finalista s'emportarà 500 euròs e diplòma e es dus accèssits 200 euròs e diplòma. Mentre qu'ena categoria "Novèlla Juvenila" eth prumèr prèmi serà de 700 euròs, eth finalista de 350 e es dus accèssits se premiaràn damb 150 euròs, toti eri damb diplòma tanben.

Aciu baish podetz trapar es bases deth Prèmi Aran de Literatura d'enguan:

1. Presentacion dera òbra:

• Auetz de signar era òbra que presentatz damb un lèma o subernòm.
• Presentaratz 6 còpies dera vòsta narracion o poesia laguens d’ua engolòpa. En exterior d’aguesta engolòpa i meteratz eth títol, eth lèma o subernòm e era categoria a qué correspon.
• En ua auta engolòpa mès petita i introdusitz ua huelha a on figure eth lèma o subernòm, eth nòm e cognòms, adreça, edat e sustot eth vòste telefòn e la barratz. En aguesta madeisha engolòpa, per dehòra, i calerà escríuer eth subernòm, eth títol e era categoria a qué correspon. Aguesta segona engolòpa acompanharà ara òbra.
• Non s’acceptaràn es trabalhs a on a simpla vista s’i veigue eth nòm der autor/a.
• Presentatz es vòsti trabalhs en interlinhat senzilh (mesura hònt 12).
• Tanben cau presentar era òbra en supòrt informatic Windows (preferentament Word).

2. Sonque s’acceptarà ua òbra per categoria, mès podetz presentar-vos enes tres categories.

3. Era òbra a d’èster inedita.

4. Es trabalhs an d’èster redigits en aranés o en quinsevolh aute dialècte o varianta der occitan.

5. Es trabalhs s’auràn de presentar en Departament de Lengua e Cultura deth Conselh Generau d’Aran abans deth 28 d’abriu de 2018.

6. Es prèmis s’entregaràn enes dies propèrs ara Hèsta d’Aran (17 de junh), laguens des actes corresponents ara sua celebracion.

7. Es òbres presentades demoraràn en proprietat deth Conselh Generau d’Aran.

8. As prèmis superiors a 300 € se les aplicaràn es retencions fiscaus en vigor.

9. Eth pagament deth prèmi se realizarà mejançant transferéncia bancària  ath numero de compde qu’eth/era guanhador/a, o eth sòn tutor o representant legau designe en formulari qu’obligatòriament s’aurà d’aumplir e liurar, validat pera entitat bancària, ara organizacion deth concors.