Baqueira-Beret se trape en tot auançar es òbres de melhora de cara ara pròplèu sason d’iuèrn. Enguan, era estacion d’esquí aranesa a aprovat un pressupòst de lèu 9 milions d’èuros entà realizar desparières intervencions.Eth projècte mès important ei era reforma dera cafeteria Del Bosque plaçada ena còta 1800. Un equipament que se veirà modernizat en tot remplaçar es diuèrsi pisi des que dispausaue, entà sonque deishar-ne un, entà acuélher ua zòna Free-Flow, a on era gent poderà servir-se eth sòn pròpri minjar.

Ath tor dera cafeteria se i bastiràn diuèrses terrasses damb vistes privilegiades ath parçan de Ruda e de bona part dera Val d’Aran. Aguesta òbra se demore que pogue èster prèsta entà octubre abantes des prumères nheuades. D’aute biais, tanben se trapen en tot substituir es vielhi canons per uns mès modèrns e economics e que se poderàn botjar de lòc.

Eth pressupòst se complemente damb era crompa de dues maquines tà caushigar era nhèu que son de besonh. Eth resultat de tot aguest trebalh ac poderàn gaudir es visitaires pendent aguesta pròplèu sason d’iuèrn, en tot supausar ua milhora considerabla des equipaments dera estacion.