Mejançant un comunicat oficiau, eth Comité Executiu de CDA-PNA a manifestat era sua preocupacion deuant era imposicion der article 155 dera Constitucion per part deth Govèrn der Estat Espanhòu.

Eth partit assegure que "entram en ua setmana trascendenta entà Catalonha, Espanha e Aran" e qu'era intencion de "suspéner era autonomia Catalana non hè sonque agreujar era situacion".

Deuant aguesta situacion demanen negociacion e dialòg entre eth Govèrn Centrau e eth dera Generalitat. 

Eth comunicat contunhe en tot rebrembar qu'era Lei d'Aran "emane deth Parlament de Catalunya e ei sonque aguest Parlament eth que l’a arreconeishuda, en an 90 e recentament en an 2015, en ton escotar e dar a Aran era possibilitat d’arténher ues còtes importantíssimes d’autogovèrn. Non i a mès enlà dera Lei d’Aran, aprovada en hereuèr de 2015, cap auta lei qu’arreconeishe era realitat aranesa".

Segontes s'assegure en document, s'eth Senat apròve era propòsta deth Govèrn Espanhòu eth Conselh Generau d'Aran patirà "de facto ua paràlisis en toti es ambits des competéncies enes qu’en aguesti moments s’està trebalhant, e sonque i aurà era activitat deth dia a dia".

Per tot açò, finalizen, "des de Convergéncia Democratica Aranesa mostram eth nòste totau refús e condemna ara interpretacion dera democràcia en aguesti tèrmes totalitaris en tot dar nauament eth nòste supòrt as institucions catalanes".