Eth plen der ajuntament de Les a aprovat en session extraordinària ua mocion contra er aplicacion der article 155 dera Constitucion Espanhòla, per part deth Govèrn Centrau en Catalonha. Aguesta mocion, que basicaments a estat ua adaptacion entara Val d’Aran dera elaborada pera Associació de Municipis per la Independència, a estat presentada e aprovada peth baile municipau, Emilio Medan e era formacion independentista Corròp per Aran.

Les a estat er unic municipi deth país en celebrar aguest tipe de plen. Medan ei membre d’Unitat d’Aran-PSC, e maugrat auer-se aprovat era mocion, era formacion socialista manten ua diuersitat ideologica, qu’a amiat a dus còssi ara abstencion, e ara presentacio d’ua esmena ara totalitat dera mocion, a on se demane era celebracion d’eleccions autonomiques.

Aguesta mocion aprovada tanben condemne es empresonaments de Jordi Cuixart e Jordi Sánchez per sedicion, e sollicite ath govèrn centrau era arturada dera suspension dera autonomia de Catalonha, pr’amor que cren que poderie afectar ar autogovèrn aranés.