Gran exit de participaires ena Shasclada deth Haro de Les d'enguan

14/05/2017

Mès de 200 persones en dinar popular, e fòrça actiuetats naues damb diuèri talhèrs e concèrt

Eth pòble de Les dejà a iniciat es actes des hèstes deth huec d’enguan, en tot celebrar era Shasclada deth Haro. Ua actiuetat que comencèc en an 2000, e qu’a compdar d’alavetz cada an amie fòrça mès gent dera Val d’Aran. Aguesta hèsta consistís en baishar er arbe deth bòsc, e dempús d’arrosegar-lo pes carrèrs deth pòble, se procedís a shasclar-lo, ei a díder, a treiguer-li era pela entà que se pogue secar, en tot daurir-lo damb cunhes e destraus. Toti aqueri valents se placen deuant deth haro e comencen a clauar-li es cunhes damb fòrça. Un viatge qu’era soca ei shasclada, se deisharà secar, e se sauvarà enquiara hèsta de Sant Pere, quan serà plaçat en centre dera Plaça deth Haro, damb era actiuetat coneishuda coma era Quilha deth Haro. Entà Sant Joan der an que ven, aguest haro serà cremat.

Enguan, eth programa dera Shasclada tanben se conformaue damb diuèrsi talhèrs de balhs tradicionaus e halhes e un concèrt de fòlk. Un corròp d’accions entà aufrir un caire mès culturau ad aguesta hèsta que dejà comence a plaçar-se coma ua tradicion enes hèstes deth huec de Les e deth conjunt dera Val d’Aran.

Manu Moga