Eth pòble de Vielha a acuelhut ena Plaça dera Glèisa un acte convocat pes signants deth Manifèst de Les en còntra dera repression.

Mès d'un centenat de persones de diferents edats e vengudes tant deth territòri aranés, coma d’autes parts de Catalonha e Occitània s’an manifestat en còntra des accions prenudes per part der estat espanhòu pendent es darrèri dies.

En aguest acte, s’a criticat tanben era manca de posicionament des institucions araneses deuant es accions prenudes per part deth govèrn centrau.

Es signants deth Manifèst de Les, que defense eth dret ara autodeterminacion de Catalonha e Aran, an afirmat qu’era pròplèu dimenjada eth territòri aranés aurà era possibilitat de votar.

Dempús des paraules d’aguesti representants politics s’a convidat as presents a compartir es sues idees e opinions sus aguest ahèr.

Ath crit de “votaram”, era plaça dera Glèisa de Vielha a defensat es drets que considèren qu’er estat espanhòu les està retalhant. Un acte que defensaue eth dret de catalans e aranesi a decidir, e qu’a acabat damb mès d’un centenat de persones cantant er imne aranés.