Resum dera Net de Sant Joan viscuda en Les e Arties

24/06/2017

Fòrça gent a estat presenta en ua des hèstes mès importantes e que remèrquen un des trets culturaus e identitaris dera Val d'Aran

Un an mès Sant Joan qu’ei tornat. Era Val d’Aran qu’a tornat a gaudir dera net mès cuerta der an, damb fòrça color, huec, mès sustot damb fòrça hèsta. En pòble de Les, coma dejà ei abituau, auec lòc era Crèma der Haro en ua serada damb un pialèr de gent que deishaue petita era Plaça der Haro. Es hlames des halhes se barrejauen damb es dera soca, que pòc a pòc enlumenauen era net. Era musica tradicionau e es balhs aranesi a cargue d’Es Corbilhuèrs de Les, aufriren un espectacle culturau ara nautada dera hèsta que se commemòre. Pendent lèu dues ores, er haro que cremaue ena plaça, mentre era gent demoraue impacienta era sua queiguda. Ua tradicion que perdure en temps e que cada viatge artenh que fòrça mès gent sigue presenta.

D’aute biais, Arties se place coma er aute epicentre des Hèstes de Sant Joan. pendent era vigília. Mès en aguest pòble de Naut Aran era tradicion qu’ei ben desparièra. Un viatge alugat eth tronc, aguest ei lançat en tèrra, prèst entà èster rosigat pes carrèrs deth pòble. Era grana particularitat d’aguesta hèsta ei, que cada viatge qu’eth tronc s’arture, eth huec s’aviue damb gasolina, mentre es valents decidissen sautar-lo peth dessús, en tot sajar d’esquivar es hlames. Son dues manères desparières de víuer era Net de Sant Joan, mès ambdues hèn part d’ua istorica tradicion que represente un tret culturau arraïtzat ena identitat aranesa.




Manu Moga