Aguesta dimenjada arribe era 7au edicion dera Vertical-Aran

28/09/2017

Eth pròplèu dissabte, 30 de seteme, arribe era naua edicion dera corsa Vertical-Aran, ua corsa qu'ei tanben un memorial ar aranés Tonet Cavero.

Era 7au Vertical-Aran prepause tres recorreguts diferents:
  • Era Marcha Populara: i pòden participar adults e mainatges a partir de 6 ans. Aguesta pròva a un total de 2km e 500m de desnivèu positiu. Er orari de gessuda serà entàs 09:30 ores ena Bassa d’Oles.
  • Era Pujada Vertical-Aran: a un recorregut de 4,2km e 1200m de desnivèu. Era gessuda se realizarà as 10:00 ores des dera plaça dera rotonda de Vielha.
  • Era Carrèra Vertical-Aran: se realizarà eth madeish recorregut qu’ena Pujada, mès se realizarà laguens dera modalitat de trail running. Era gessuda serà as 11 ores ena rotonda de Vielha.
Aguesta pròva ei organizada pera Pòrta d’Aran, compde damb eth supòrt der Ajuntament de Vielha e Mijaran e eth Conselh Generau d’Aran, e era participacion des Volentaris d’Aran.

Entath baile der Ajuntament de Vielha e Mijaran, Juan Antonio Serrano, “aguesta ei ua pròva plan destacable laguens deth municipi, pr’amor que supause era coronacion d’ua des montanhes mès importantes entàs vesins de Vielha e Mijaran, eth Montcorbison”.

Eth baile afirme tanben que “ath delà d'ua pròva de running, era 7au Vertical Aran tanben supause ua bona activitat entà realizar en familha gràcies as diferentes modalitats qu’aufrís. Cau híger qu'es competicions d’aguest tipe, ajuden a contunhar posicionant Vielha e Mijaran coma un cap-lòc de referéncia entara realizacion d’eveniments esportius”.

Era organizacion dera pròva non exigís un materiau minim, mès recomanen portar ròba d’abric, aigua e bastons. Es inscripcions se pòden realizar de forma presenciau ena botiga d’Era Pòrta d’Aran de Vielha e tanben en sòn portau web.
Clara Villar