Grana notícia entar espòrt aranés, e en concrèt ath mon der esquí. Eth freerider aranés, Aymar Navarro, a estat escuelhut en un grop de 36 esquiaires entà obtier eth prèmi "European Skier of the Year" qu'autrege eth miei especializat Downdays. Aguest nomentament ei un reconeishement ara grana sason 2016/17 qu'auec Navarro. As sòns 28 ans, aguest freerider ei un des referents d'aguesta especialitat esportiua a nivèu nacionau. 

Entà escuélher eth guanhador d'aguest guerdon, ja se pòt votar online, en un procés dubèrt. Aguesta ei era direccion entà eméter eth vòt: https://www.downdays.eu/poll/2017-european-skier-year-round-1-men/

Ena prumèra ronda se seleccionen un totau de 10 nòms, de manèra que se decidiràn es 16 esquiaires qu'auancen ara següenta votacion. Aguesta prumèra ronda finalizarà eth 25 de noveme entàs 20:00.

Aymar Navarro artenhec un istoric pòdium en Freeride World Tour de Vallnord Ordino-Arcalís (Andòrra). Ua 3au plaça meritada dempús d'ua espectaculara baishada per ua linha damb un doble saut ena part superiora, en tot auer participat coma convidat. 

Cau remercar que Navarro a amiat a tèrme era 2au edicion deth sòn projècte South Linen pendent er ostiu, a on eth freerider viatgèc entà Sudamerica damb es sòns companhs Adrià Millan e Txema Trull.