Ara fin a arribat eth dia mès demorat entàs amants dera nhèu, e ei qu’en Baqueira dejà a inaugurat era naua tempsada d’esquí.

Enguan, era sason a arribat ua setmana abantes dera data prevista gràcies as nheuades e as heiredes temperatures deth mes de noveme. 25 pistes dubèrtes entà començar a gaudir der esquí e er snowboard.

Ena prumèra jornada en Baqueira an acompanhat eth solei e es bones temperatures, ath delà d’ua nhèu en fòrça bones condicions.

Es prumèrs dies ei previst qu’es usuaris que pugen tà pistes siguen, sustot, es pròpis aranesi e gent damb residéncia ena Val d’Aran. Mès se demore qu’er auançament dera tempsada servisque entà augmentar es reserves de cara ath pònt de deseme.

Pendent era prumèra setmana contunharàn dubèrts aguesti 30 quilomètres esquiables, e des dera estacion contunharàn trebalhant damb fòrça intensitat entà, a compdar de dissabte, 25 de noveme, anar daurint progressivament es zònes de Bonaigua, Argulls e Beret, e atau auer dubèrts eth maxim de quilomètres possibles de cara ath 6 de deseme.