Eth plen der ajuntament de Bossòst aprovèc pendent era darrèra session ordinària eth convèni entà desvolopar ua escòla de gòlf, laguens deth projècte tà bastir eth camp de gòlf previst en parçan dera Lana. Ua mesura que segontes manifestauen des deth govèrn municipau, poderà facilitar era possibilitat de recéber bèra subvencion per part dera Federacion Espanhòla de Gòlf.

Damb aguest caire formatiu que se preten arténher damb era escòla de gòlf, eth govèrn municipau confirme qu’en projècte dera Lana non i aurà cap tipe d’operacion residenciau e urbanistica.

Ath delà, eth plen tanben aprovèc eth modèl de contràcte particular damb es proprietaris des terrens dera Lana a on se vò bastir eth camp de gòlf. Un modèl de loguèr, damb era cession des terrens per 30 ans, que correrà a cargue dera empresa explotadora dera installacion esportiua.

Es dus punts s’an aprovat, en tot compdar damb era abstencion dera oposicion de Convergéncia Democratica Aranesa. Damb es certificacions cadastraus se sap es parcèles que i a e guaire aparten a cada proprietari. Tot aguest projècte encara tardarà uns mesi en auançar, pr’amor que s’a de negociar ara damb cada un des proprietaris, e ath delà, s’aurà de hèr un plan especiau urbanistic en parçan dera Lana. Mès es passi que se realizen, auancen damb bon pè cap ad aguest camp de gòlf que compdarie, en principi, damb 9 horats.