Eth Conselh dejà a dubèrt eth termini entà qu'es joeni esportistes aranesi solliciten es subvencions economiques entara sason 2017/2018. Aguestes ajudes cerquen motivar era contunhitat dera carrèra esportiua d'aguesti joeni mentre estudien, e que poguen convertir-se atau en esportistes de naut rendiment.

Se concediràn dus tipes de subvencions, enquia un impòrt maximal de 19.000 €. Era "Bèca A" damb un impòrt de 1.500 € e era "Bèca B" per un impòrt de 750 €.

Aguest termini serà dubèrt enquiath 30 de seteme e es requisits indispensables entà gésser beneficiat son: corsar actuaument ensenhaments obligatòris (ESO) o post-obligatòris (Cicles Formatius, Bachillerat o Estudis Universitaris), auer entre 12 e 22 ans e èster esportista en actiu.

Ath delà auran d'auer aprovat un percentatge minim de matèries:

-   En cas de corsar estudis d'ESO o Bachillerat, auer aprovat 100% des matèries matriculades en cors anterior ar actuau.
-   En cas de corsar estudis universitaris:

• Carrères tecniques: Èster matriculadi en un minim de 50% de matèries e auer aprovat 70% des crèdits matriculadi en cors anterior ar actuau.
• Carrères umanistiques, sociaus, letres: Èster matriculadi en un minim de 50% de matèries e auer aprovat 80% es crèdits matriculadi en cors anterior ar actuau.

Ei de besonh qu'es beneficiaris siguen residents en Aran, damb un empadronament en quinsevolh des municipis aranesi pendent un minim de dus ans immediataments anteriors ad aguesta convocatòria. Entà concedir aguestes ajudes, se considerarà era edat des esportistes, atau coma es resultats esportius obtengudi e es diuèrsi nivèus de competicion en que participen (grop de competicion internacionau, estatau o autonomic).

Entà concedir es subvencions se crearà ua Comission Tecnica d'Avaloracion integrada, entre uns auti, peth conselhèr d'Espòrts e Joenessa deth Govèrn d’Aran, Luís Carlos Medina, e peth responsable tecnic deth Conselh Esportiu dera Val d’Aran.

Entà mès informacion e tà poder formalizar es sollicituds podetz consultar ena web deth Conselh Generau d'Aran.