Eth Club Curling Val d’Aran torne a èster actualitat damb un nau exit esportiu. Pendent era darrèra dimenjada, era equipa deth Val d’Aran Montcorbison artenhèc era 2au posicion ena Liga Catalana, dempús dera disputa dera fasa finau en Puigcerdà, a on es campions sigueren es anfitrions. Es aranesi arribauen ad aguesta fasa coma líders dempús dera prumèra fasa celebrada en Vielha, mès, fin finau, aueren de conformar-se damb era 2au plaça en pòdi finau.

Eth Club Curling Val d’Aran presentarà ua reclamacion pes condicions deficientes que presentaue era pista de gèu de Puigcerdà, pr’amor que dificultèc eth jòc pendent era competicion, e provoquèc que perdessen eth liderat dera Liga Catalana que s’auien guanhat setmanes endarrèr en Vielha.

Ath delà, pendent era celebracion dera fasa finau dera Liga Catalana, se disputèc ua varianta naua: eth campionat de dobles mixtes, a on es jogadors aranesi artenheren era medalha d’aur, de manèra qu’eth curling aranés tornèc tà casa damb un parelh de trofègi jos eth braç.

Ath delà, eth club Curling Val d’Aran demanarà ara Federacion Catalana d’Espòrts d’Iuèrn, que de cara ara pròplèu sason, era Liga Catalana se pogue celebrar enes installacions deth Palai de Gèu de Vielha en tot concentrar era competicion en ua unica dimenjada. De moment, enguan, encara manque per celebrar eth campionat d’Espanha dera 2au Division, qu’aurà lòc en Vielha pendent era prumèra dimenjada deth mes de hereuèr.