Dejà a finalizat era Trail Carlac 2017, er eveniment esportiu mès demorat en terçon de Quate Lòcs.

Era Trail Carlac comencèc diuendres 16 de junh damb eth Sprint Verticau nocturn d’1,3 quilomètres, dissabte 17 auec lòc era Montlude Skyrace de 26 quilomètres, mentre qu’ena darrèra jornada s’an realizat era rèsta de competicions: per un costat, era Maraton Quate Lòcs, un totau de 43 quilomètres en tot passar pes quate municipis deth terçon: Bossòst, Les, Bausen e Canejan; per un aute costat, era corsa deth Bòsc de Carlac, 19 quilomètres a on es corredors an pujat enquia Bausen e, en darrèr lòc, era Vila de Les, era corsa de 9 quilomètres de caracter popular, que s’a podut hèr tanben caminant.

Enguan s’an produsit quauques nauetats, coma qu’era gessuda siguesse ena Plaça der Haro e era arribada ath costat dera sala sociau. Era participacion a estat fòrça nauta e a creishut sustot, eth nombre d’hemnes que participauen, especialment ena corsa Vila de Les, a on de 65 inscrits, sonque 20 an estat òmes.

Ena Trail Carlac era pròva mès dura ei eth Challenge, que consistís en superar er Sprint Verticau, era Montlude Skyrace e era Maraton Quate Lòcs, un totau de 71 quilomètres e molt d’esfòrç en sonque tres dies. Eth guanhador d’aguesta pròva a estat, un còp mès, er actuau campion de Trail d’Espanha, Miguel Caballero, que s’a mostrat fòrça satisfèt pera sua victòria.

Dempús de tres dies d’intensa activitat, arribe eth moment de recuperar fòrces de cara ar ostiu e començar a premanir era pròplèu edicion dera Trail Carlac, que mos demore er an que ven damb mès pròves e mès nivèu encara.