Pendent era setmana passada, er alpinista catalan Òscar Cadiach siguec arrecebut ena sedença deth Conselh Generau d'Aran, a on eth Govèrn aranés ratifiquèc era esponsorizacion dera pròplèu expedicion de Cadiach ath Broad Peak (8.047m), tanben conegut coma K3.

Er alpinista, naturau de Tarragona e damb viuenda en Vilamòs, se poirie convertir en prumèr catalan en completar es 14 ueit mil sense oxigèn artificiau. 

Cadiach tornarà a sajar finalizar eth Broad Peak pendent aguesti mesi de junh, junhsèga e agost, ua expedicion que durarà 50 dies e a on er alpinista portarà es emblemes deth Conselh e era imatge corporatiua de "Val d'Aran. Era esséncia des Pirinèus" ena sua indumentària.

Ara tornada d'aguest ascens, er alpinista fomentarà era rota entar Aneto peth sòn vessant aranés (que cada còp compde damb mès seguidors), damb er objectiu de refortilhar era vinculacion dera Val d'Aran damb era nauta montanha. 

Cadiach a coronat enquiara 16 crestes que depassen es ueit mil mètres e a estat 26 còps per dessús d’aguesta còta. Damb aguesta naua aventura ath Broad, eth tarragonin ja some 66 expedicions en Imalaia.

IMATGE: CONSELH GENERAU D'ARAN