Resum dera 5au edicion de "Era Nocturna de Vielha"

11/08/2017

Es carrèrs de Vielha an tornat a acuélher, un an mès (e damb aguest ja en van cinc), ua naua edicion dera corsa popular “Era Nocturna”. Pròp de 600 persones de totes es edats e condicions passèren, eth passat dissabte 5 d’agost, ua serada d’espòrt, òci e familha.

Entara sua celebracion, er Ajuntament de Vielha e Mijaran barrèc quauqui des carrèrs principaus de Vielha, tà poder atau assegurar era seguretat de caminants e corredors.

Eth Passeig dera Libertat, era Avenguda Maladeta, eth Carrèr Sarriulera, era Avenguda Pas d’Arró e d’auti carrèrs deth centre de Vielha formauen part d’aguest recorregut urban que centenats de persones recorreren amassa eth passat dia 5.

Enguan, des dera organizacion se trapen fòrça contents pera nauta participacion qu’a agut era corsa, superior ara d’est an passat.

Er eveniment comencèc tàs 7 dera tarde damb es mès petits: ua corsa infantil ena que participèren un totau de 120 mainatges e mainades, animats e seguits de ben a pròp pes sues familhes.

Un còp finalizada era corsa infantil, ère eth torn dera caminada popular de 5 quilomètres, que siguec, coma cada an, un èxit d’assisténcia. 

Tàs 9 deth sèr arribaue era gessuda des pròbes mès demorades: es corses de 5 e 10 quilomètres, enes que, professionaus e aficionats gesseren a dar lo milhor d’eri madeishi. Pes carrèrs, toristes e vesins, animauen as corredors, que pòc a pòc anauen arribant ara linha de meta, uns patint mès que uns auti.

Eth prumèr en arribar siguec Mariano Val que, damb un temps de 19 menutes e 3 segons se convertie en campion des 5 quilomètres masculins, seguit per Bryan Peña, qu’arribaue 23 segons dempús.

Alexandra Baisan e Ramona Gabor quedauen prumèra e dusau hemnes d’aguesta distància, respectivament damb uns tempsi de 25:01 e 25:18.

En çò que tanh ara corsa des 10 quilomètres masculins, fòrça ajustats anèren es resultats. Finaument, Marc Espinar, de sonque 14 ans, conseguie guanhar a Imanol Rojo damb un temps de 34:07, treiguent-li 5 segons de distància.

En cas des hemnes, Eva Gimeno pujaue en lo mès naut deth pòdium damb un temps de 42:09, seguida pera aranesa Marta Cester, damb 42:28.

Mès enlà de tempsi e classificacions, çò de mès destacable d’Era Nocturna siguec, coma en cada edicion anterior, eth gran ambient que se viuec enes carrèrs de Vielha.

Entà acabar aguesta espectacular jornada, auec lòc era entrega de prèmis e un sorteig de materiau e diuèrsi presents dubèrt a toti es corredors. Era milhor manèra d’acabar era serada.

Clara Villar