Signatura deth convèni tà bastir era escòla e eth camp de gòlf de Bossòst

11/10/2017

Eth projècte serà prèst en un parelh d'ans, damb un pitch&putt de 9 horats en Era Lana

Er ajuntament de Bossòst dejà a hèt efectiva era signatura der acòrd a 3 bandes, damb era enterpresa Green Project e era benefactora Pilar Teneu entà començar a bastir eth projècte deth camp e era escòla de gòlf enes terrens dera Lana de Bossòst. Aguest acòrd ei era ratificacion dera aprobacion deth projècte que ja s’amièc a tèrme pendent era darrèra session plenària der ajuntament. Un acòrd que supause eth bastiment d’un pitch & putt de 9 horats damb opcion d’ampliacion a 18. Ara madeish, es esfòrci se centren en convéncer ara setantia de proprietaris des terrens.

Era cession d’aguesti terrens serà per 30 ans. Pera sua part, Green Project calcule qu’eth pressupòst de tot eth projècte se place ath tor des 750.000 èuros, en tot escuélher Bossòst coma lòc ideau entà dispausar d’aguesta naua installacion esportiua. 

Ath delà, deth barrament der acòrd damb es prorietaris des terrens, manque era implementacion d’un plan especiau urbanistic, en tot remercar que non i aurà cap tipe de bastissa residenciau. Un viatge prèst tot eth projècte se daurirà a concors entà escuélher era milhor prepausa entà explotar aguest camp de gòlf. Se demore qu’en un parelh d’ans aguesta naua installacion sigue dejà ua realitat en municipi de Bossòst.

Manu Moga