Eth dret ara autodeterminacion en Aran, protagonista der acte "Volem Votar"

31/08/2017

Dus Conselhèrs dera Generalitat e eth Sindic d'Aran entre es desenes d'assistents

Era Val d’Aran acuelhec era tarde deth 30 d’agost er acte Volem Votar. Diuèrses personalitats relacionades damb era politica aranesa se dèren cita ena sala Era Audiovisuau de Vielha entà presentar eth Manifèst de Les e respóner a toti es dubtes qu’es assistents podessen auer en torn ar 1 d’octubre e ath dret ara autodeterminacion.

Eth Manifèst de Les ei un document signat per 10 representants politics de diferents partits e qu’a coma objectiu aufrir as aranesi eth dret a votar en referendum pera independéncia de Catalonha.

Aguest acte compdèc damb era inesperada preséncia des conselhèrs de Presidéncia e Cultura dera Generalitat, atau coma era deth Sindic d’Aran e d’autes figures politiques deth territòri. Siguec un acte fòrça participatiu a on es assistents poderen mostrar es sues inquietuds relacionades damb aguest ahèr.

Era principau incognita entre es desenes de persones presents ère se Aran aurie era oportunitat de votar en aguest referendum encara qu’es Ajuntaments non daurissen es collègis er 1 d’octubre, eth Conselhèr Turull siguec er encargat de dar era version dera Generalitat.

Era posicion de quauqui representants d’Unitat d’Aran e Convergéncia Democratica Aranesa siguec questionada per ponents e participants der acte.

Eth Conselh Generau d’Aran aprofitèc entà mostrar era sua disponibilitat a ajudar ara Generalitat en tot çò que pogue relacionat damb aguesta question. 

Eth deth dret a decidir ei un conflicte qu’era Val d’Aran està viuent de molt a pròp e qu’està afectant fòrça as dus partits politics majoritaris deth territòri. Manque demorar eth pas des setmanes entà saber coma evolucione aguest ahèr e quin ei eth posicionament des aranesi.

Clara Villar