Mireia Boya: "Deluns 9 d'octobre proclamaram era Republica Catalana independenta"

05/10/2017

Era portavotz dera CUP en Parlament de Catalonha, assegure qu'es resultats deth referendum avalen era independéncia unilaterau de Catalonha

Aguest pròplèu deluns 9 d’octobre, eth Parlament de Catalonha s’amassarà en session "ordinària excepcionau" damb un sonque punt dera orde deth dia: Analisar es resultats deth referendum deth passat 1 d’octobre, e coma dejà a manifestat era deputada aranesa dera CUP, Mireia Boya, serà eth moment en qué se procedirà a proclamar era independéncia de Catalonha.

Boya a hèt ua crida ara mobilizacion dera ciutadania catalana entà qu’açò sigue possible. Ath delà, a assegurat que per molt que des deth Govèrn Centrau se sage d’arturar aguest plen, eth Parlament serà prèst tà empedir interferéncies.

Deluns ei previst que pendent era celebracion deth plen, eth president dera Generalitat de Catalonha, Carles Puigdemont, hèsque ua declaracion, mès encara non se sap se serà d’independéncia dempús d’informar sus es resultats deth referendum.

Manu Moga