Moratòria d'un an entàs licéncies d'abitatges toristics en Vielha e Mijaran

14/09/2017

Pendent eth darrèr plen der Ajuntament de Vielha e Mijaran s’a aprovat ua moratòria d'un an entà dar licéncies as abitatges d’usatge toristic en tot eth municipi. Era rason entad aguesta accion a estat era dificultat que trapen molti vesins e persones que vien aciu a trebalhar entà trapar loguèrs dignes e damb prètzi rasonables.

En aguest sentit, er Ajuntament dejà pugèc e uns ans era taxa que s’a de pagar entà auer aguest tipe d’abitatge, mès pensen qu’ei de besonh ampliar es mesures entà qu’era situacion milhore.

Era oposicion a volut aufrir era sua ajuda ath consistòri entà trapar ua solucion conjunta ad aguest problèma des viuendes toristiques.

En aguest plen s’a procedit tanben ara aprobacion dera 3au modificacion deth pressupòst deth consistòri, pera quau se destinaràn diuèrses partides entara milhora e manteniment de carrèrs, infraestructures e d’autes ahèrs.

En aguest ahèr era oposicion a votat en còntra, manifestant eth sòn desacòrd as pressupòsti der Ajuntament.

Eth grop de Ciutadans a hèt arribar ua demana per part des trebalhadors en ostalaria deth municipi entà que, des der Ajuntament, s’hèsque arribar en Conselh ua propòsta entà ajustar es oraris deth transpòrt public, especiaument pera net, e qu’aguesti s’ajusten as jornades laborals d’aguesti professionaus deth sector.

Pendent aguest plen s’a modificat per majoria absoluta era ordenança municipau entà perméter as otèls deth municipi poder installar terrasses annèxes as sòns establiments, dera madeisha manèra qu’ac pòden hèr bars e restaurants.

Clara Villar