Aprovat eth pressupòst de 2018 deth Conselh en 27,5 milions d'èuros

27/11/2017

Mès deth 50% deth pressupòst se destine ar airau sanitari e amendrís eth romanent de tresaureria

Eth plen deth Conselh Generau d’Aran a aprovat pendent era darrèra session extraordinària, eth pressupòst dera institucion entar an 2018. Aguest pressupòst qu’a compdat damb es vòts a favor deth govèrn de Convergéncia Democratica Aranesa e era abstencion dera oposicion d’Unitat d’Aran e eth Partit Renovador d’Arties e Garòs, se formalize en 27,5 milions d’èuros. Ei un pressupòst en qu’es partides contunhen ath d’enguan e que se manten en chifres semblants. Aguesta aprovacion ei ua hita tanplan important, pr’amor que s’a podut barrar abantes de començar er exercici en qüestion. Destaquen es lèu 15 milions d’inversion en airau sanitari, qu’ei lèu eth 50% deth pressupòst, 1,5 milions entà acondicionar es espacis naturaus, 2 milions entath bastiment dera residéncia de Les a trauès deth romanent de tresaureria, 390.000€ entar aqueriment de naues ambulàncies e 300.000 entà apariar era carretèra de Mont e Montcorbau.

Pera sua part, Unitat d’Aran a votat pera abstencion, en tot remercar era problematica que i a en Conselh Generau d’Aran ath tor des ingrèssi, en tot soslinhar era preocupacion per auer de redusir eth romanent de tresaureria.

Ath delà, Unitat d’Aran tanben a demanat en plen qu’entà abordar eth problèma dera capacitat de decidir sus era despena, era comission d’ahèrs institucionaus sigue qui se n’encuede de trebalhar sus eth nau sistèma de finançament deth Conselh.

Manu Moga