Er Ajuntament de Naut Aran met sus era taula es infraccions urbanistiques cometudes en quauqui garatges

15/06/2017

En darrèr plen deth consistòri s'an modificat quauqui aspèctes normatius qu'afècten ara urbanizacion Plaus d'Arties

Pendent era darrèra session de plen der Ajuntament de Naut Aran s’a procedit ara aprobacion de diuèrsi ahèrs, entre eri, un des de mès importància a estat era modificacion de determinats aspèctes normatius deth bastiment ena urbanizacion Plaus d’Arties.

S’a amiat a tèrme tanben era modificacion numerò 2 deth pressupòst d’enguan, que se destinarà a diuèrsi ahèrs coma es òbres de milhora dera carretèra de Bagergue o era brigada d’ostiu.

A estat aprovada per unanimitat era mocion que demane que toti es casi de clausula tèrra que se produsisquen en territòri poguen gestionar-se des deth jutjat de Vielha e non auer de desplaçar-se enquia Lhèida, coma ei establit des deth dia 1 de junh.

En darrèr lòc, s’a dat compde des infraccions urbanistiques cometudes en quauques cases dera urbanizacion Val de Ruda, a on dempús dera inspeccion tecnica municipau se suspècte qu’estan hènt a servir es garatges coma viuendes.

Ath delà, s’a procedit tanben ara aprobacion definitiua des compdes der Ajuntament der an 2016 atau coma ara des hèstes locaus deth municipi entath pròplèu an 2018.

Clara Villar