Eth síndic d'Aran, Carlos Barrera, a manifestat era voluntat deth Govèrn d'Aran de no cedir es sedences administratiues e institucionaus proprietat deth Conselh Generau d'Aran entara celebracion deth referendum d'autodeterminacion de Catalonha deth pròplèu 1 d'octobre. Aguesta ei era principau conclusion qu'a manifestat Barrera ena darrèra session ordinària deth Plen deth Conselh Generau d'Aran. Maugrat aguesta negativa, non a barrat es pòrtes a poder cedir d'auti espacis non institucionaus. Considère qu'encara i a temps sufisient entà arribar a un acòrd ena equipa deth govèrn dera institucion, pr'amor qu'e s'an d'amassar entà préner era decision definitiua.

Ath delà, Barrera a manifestat que çò de mès important entath Govèrn d’Aran ei trebalhar pera mantenença dera figura deth Conselh Generau d’Aran e er autogovèrn aranés que s’a artenhut d’ençà de 1991. Ua opinion que tanben a eth beneplacit dera oposicion d’Unitat d’Aran e eth PRAG en Conselh.

Per tant, çò qu’a quedat manifèst ei era implicacion des desparièrs grops deth Conselh ena preservacion des interèssi dera institucion e çò que represente en un territòri de pròp de 10.000 abitants.